تغطية زواج الشاعر محمد بن حسين الكثيري

مبـروك يامحمـد وافـي المواجيـب=راعي الخصـال الوافيـة مـع خويـه

ومن عادتي اجزي هل الطيب بالطيـب=باخـلاص نوفـي والمعـزة سـويـه

سلام (ن) اطيب من فياض(ن) معاشيب=واحلى من السكـر لنفـس(ن) شهيـه

جيتك مـن العـواد احمـل تراحيـب=ماشرق شعاع الشمس واغرب عشيـه

جيتـك ابـارك ياعطيـب المضاريـب=ياللي على الطـولات كاسـب سجيـه

جدك بصيـص يـوم يرقـا المراقيـب=اخذتهـا مـنـه وصــارت مـزيـه

او كن ابن عـروج معطيـك تنصيـب=يامحمد ابن حسيـن .. قـود السريـه

ياشعيل جدك خلـف الذيـب والذيـب=خلـف رجـال(ن) ماتهـاب المنـيـه

وسـلام منـي يـاكـرام الأشانـيـب=احلى مـن المـاء للكبـود الضميـه

علـى الأقـارب بالقصـر والأجانيـب=قصر الريـاض اللـي تعالـى بضيـه

ومن لبنـي خالـد رجـال التجاريـب=كبار البيوت اهـل السمـوت العليـه

اخصهـم بازكـى محبـة وترحـيـب=لا جيتهـم تلقـى البشاشـة نقـيـه

ودعيت من هو يعلـم السـر والغيـب=تعيش يابـن حسيـن باسـرة هنيـه